«Жер сағаты» экологиялық акциясы – әлемдегі ең ауқымды шаралардың бірі. Жыл сайын оған әлемнің 180 елінен шамамен екі миллиардқа жуық адам қатысады. Белгіленген уақытта қалаларда жарық пен электр құрылғылары, ескерткіштердің, муниципалдық және басқа да маңызды ғимараттардың жарықтандыруы сөндіріледі. Бұл табиғи ресурстарға жауапкершілікпен қарау қажеттігін еске салу үшін ұйымдастырылады.

Бүгін мектептің педагогтері, оқушылары мен ата-аналары «Жер сағаты» акциясына қатысты. Сағат 20:30-дан 21:30-ға дейін оқушылар мен мұғалімдердің үйлері қараңғылыққа бөленді. Шам жарығында олар үстел ойындарын ойнап, жақындарымен әңгімелесіп, кітап оқып, әсерлерімен бөлісіп, жылы отбасылық атмосферада уақыт өткізді.

Бұл акция барлық қатысушыларға табиғатты аялаудың, электр энергиясын үнемдеудің және планетамыздың болашағына қамқорлық жасаудың маңыздылығын еске салды. Әр адамның аз ғана үлесі үлкен өзгерістерге әкелуі мүмкін.