2026 жылғы 27 ақпан күні облыстық инновациялық-әдістемелік орталық жоспарына сәйкес «Рымбек Байсейітов атындағы жоғары қаржы-экономикалық колледжі» КМҚК базасында «SCAFFOLD: колледждердің үздік тәжірибелері» облыстық педагогикалық тәжірибелер фестивалі жоғары деңгейде өтті.
Фестиваль өңірдің техникалық және кәсіптік білім беру ұйымдары педагогтерін бір арнаға тоғыстырып, SCAFFOLD технологиясын білім беру процесіне тиімді енгізудің нақты, тәжірибеге негізделген үлгілерін ұсынған кәсіби алаңға айналды.
Бағдарлама аясында педагогикалық тәжірибелер жәрмеңкесі, шеберлік сабақтары, шағын-сабақтар және әдістемелік питч-сессиялар ұйымдастырылды. Қатысушылар білім алушыларды педагогикалық сүйемелдеудің тиімді құралдарын, қолдаудың кезең-кезеңімен жүзеге асырылуын және дербестікті қалыптастыру тетіктерін таныстырды.
Ұсынылған тәжірибелер бірыңғай әдістемелік критерийлер негізінде бағаланып, сараптамалық ұсынымдардың объективтілігін қамтамасыз етті. Бұл өз кезегінде енгізу мен тарату әлеуеті жоғары шешімдерді айқындауға мүмкіндік берді.
Фестиваль қорытындысы бойынша сарапшылар ұсынған үздік тәжірибелер «SCAFFOLD: өңір колледждерінің үздік тәжірибелері» атты электрондық жинаққа енгізілетін болады.
Аталған фестиваль Абай облысында педагогтердің кәсіби қоғамдастығын дамытуға және тәжірибеге бағдарланған оқыту тәсілін жүйелі түрде нығайтуға бағытталған жұмыстардың нәтижелі жалғасып жатқанын көрсетті.