⚡️Қоғамда бәсекеге қабілетті, жауапкершілігі жоғары, еңбексүйгіш ұрпақ тәрбиелеу – мемлекеттің стратегиялық міндеттерінің бірі. Осыған орай «Адал азамат» біртұтас тәрбие бағдарламасы аясында «Жас ұрпақты еңбекке баулудағы өнер мен кәсіптің рөлі» тақырыбында республикалық семинар өткізілді. Аталған іс-шарада облыс орталығы – Семей қаласының мектептеріндегі тәрбие ісі жөніндегі директордың орынбасарлары А. Кожекенова (№ 4 ЖОББМ), Ш. Сапанова (№ 44 ЖОББМ), Б. Тунгатова (№ 30 ЖОББМ), Б. Ахметова (№ 50 ЖОББМ) өз тәжірибелерімен бөлісті. Тәжірибе алмасу барысында облыс педагогтері «Адал азамат» бағдарламасының құндылықтары негізінде жас ұрпақты еңбекке баулуда өнер мен кәсіптің тәрбиелік, білімдік және әлеуметтендіруші әлеуетін айқындауға назар аударды. Сонымен қатар білім беру үдерісін интеграциялау арқылы оқушылардың шығармашылық қабілетін, еңбекқорлығын және кәсіпкерлікке бейімділігін дамытуға бағытталған озық педагогикалық тәжірибелерді таныстырды. Семинар аясында Абай облысының педагогтері «Креативті («Art-Lab») жобалар алаңында жаһандану жағдайында ұлттық құндылықтарды сақтай отырып, оқушылардың креативті ойлауын, еңбек мәдениетін және әлеуметтік белсенділігін арттыру тетіктерін ұсынды. Ұлттық өнер мен заманауи креативті индустрияны ұштастыру арқылы еңбекке құрметпен қарайтын, қоғам игілігіне қызмет ететін адал азамат тәрбиелеудің тиімді модельдері таныстырылды.
